香港鬼故事 [複製鏈接]

雪席

Teenager I

Rank: 7 Rank: 7 Rank: 7

好友: 0
帖子: 4613
積分: 9224
最後登錄: 2018-7-31
在線時間: 0 小時

電梯直達

樓主

發表於 2013-9-30 17:23:14 |只看該作者 |倒序瀏覽

十年前，媽咪因為意外過身，而我果時仲好細個，得１２、３歳。由細讀到大都係基督教學校，所以我當時都係基督徒。只有果一年我經常遇到靈異事件，直至我無信基督教之後就無再見過喇，之後都一直黑仔左好幾年。

第一次要由事發當日講起。果日啱啱放學番屋企，屋企只有我一個人，番到屋企無耐有位親戚打來同我講你爸爸打傷左你媽咪，即係我爸爸打傷佢之後打左比我親戚問點算好，我親戚叫佢盡快報警，無幾耐有軍裝禁門鐘，呢位軍裝哥哥都算好人，入來見我細個，好有禮貌咁問我知唔知發生左咩事，又同我傾計，傾下學校既野咁。之後我細路妹陸續番屋企，呢位軍裝哥哥就走左，輪到幾個男便裝上來，佢地上左來無幾耐又嗌悶又嗌要收工，係度話其他人一早收左工啦，得我地要睇住班細路，又揾屋企D野食同開電視睇波。之後兩個女便裝同我親戚上來，女便裝鞋又唔除又嗌熱自己禁著冷氣。件事發生左幾日之後媽咪就過左身了，我之後遇到既差人基本上都差唔多，無個好。我亦都好憎果幾位差人直到而家。

由於無曬大人，我又係大女，要負責認屍同搞身後事。仲好記得其中一次兩位警察遲大到同係殮房推我去登記，但位登記職員話我唔夠１８歳唔可以登記。頭一兩次認屍我都唔太驚，但已經開始成日發惡夢。

事發後無幾耐，我地番到䅁發現場唔記得為左咩，果度係流浮山既某空地貨櫃內，附近係停車場，去到見到成攤血仲係度，有十幾廿隻蜻蜓係附近盤旋，覺得好不安。

有一次，我日頭搭去金鐘搞d相關事宜。當時係坐係巴士上層最後座。坐到中途，無端端前面巴士中段座位有個『人』向我微笑，但佢個樣完全唔似一個人，髮型係好短好短既茹頭，眼球好似兵乓波咁大，橙色眼珠，無鼻，塊面爛曬。佢對住我個微笑非常詭異，我望到呢一幕呆左幾秒，個腦一片空白，之後回過神來，係度諗人地係咪毀左容，但諗真d邊有可能毀成咁，再望番過去個位原來係無人既。到今日我仲好記得佢個樣。

係見過呢位『朋友』之後，我夜晚訓覺開始變成一件好恐怖既事。首先係比鬼壓，亦有可能係純粹壓力太大，幾乎晚晚都被鬼壓，努力掙扎張開眼會見到一大堆紅色線，旁邊有個有角，個樣成隻怪物咁既『人』，同埋比『人』捏住條頸，透唔到氣非常辛苦。

除此之外，仲會半夜聽到人唱粵曲同唱歌，唱歌既『人』把聲非常尖，而且應該係細路來既，直頭可以用『娃鬼回魂』黎形容呢d歌聲晚晚都係突然好大聲唱幾分鐘又無左。