之前 Lenovo 發佈會，蛇叔已為大家介紹過 Yoga Tablet 2 / Pro，但想唔到剩下未試的 Windows 版本 Yoga Tablet 2 竟然吸引我去「課金」自用，想知佢有咩吸引我有 Macbook Pro Retina 都唔用？咁要留意我的第一身試用感覺。（以下有更多資料。）
蛇叔雖然係 unwire 記者，但跟普通人一樣都想買部又輕又平的 Notebook，我本身已經有 Macbook Pro Retina 13″ 及 Lenovo Miix 8，前者太大部攜帶不便，後者要額外帶鍵盤，講到底都冇兩全其美方案。或許大家會建議買 Macbook Air 11″、Transformer T100 或 Switch 10 等等機種，但佢地唔係太貴、屏幕唔靚、就係太重，直到試玩 Windows 版 Yoga Tablet 2 我就決定「課金」自用，甚至令我對 Windows 平板稍為改觀，點解？
▲ 要性能、要屏幕畫質有 Macbook Pro Retina 13″，但缺點是仍然感覺太重。
▲ 為 Miix 8 特別買了 Microsoft Wedge 鍵盤，雖然這個組合夠輕，但鍵盤本身唔算便攜，而且冇 TouchPad 操作總是唔太方便。
屏幕高清 睇片聲畫兼備
第一個原因是屏幕，因為 Yoga Tablet 2 使用 1,920 x 1,200 IPS 屏幕，驟眼睇畫質已勝過上述提及機種（1,366 x 768 太低清吧！）。屏幕本身未見偏色或過份濃烈感覺，要來打稿或睇書都算唔錯。睇片方面， Stand 模式除了可舒舒服服睇片，其實它還設前置喇叭，蛇叔最近睇「HKTV」都係靠晒佢，即使唔駁喇叭音量都很足夠，但就缺乏一點重低音。
▲ 有了 1,920 x 1,200 屏幕在 unwire.hk 主頁中的細字依然非常銳利。
▲ 用 Stand Mode 就可舒舒服服坐係度睇「警界線」。
易拎、唔易「反機」！
第二是 Yoga 設計，雖然「變身」好似好無聊，但無可否認佢係我考慮原因之一。首先，部機本身唔輕（成 692g），但重心傾向手柄位置拿起其實唔算好重，同傳統「平板」成部「墜手」感覺很不同。
其次，佢個支架模式好似同 Surface Pro 3 差唔多，但配埋藍牙鍵盤打字兩者就有明顯分別，而關鍵在於支撐重心，Surface Pro 3 關節位於機背，缺點是支撐力較弱，之前天恩都試過係大脾打字容易「反機」；而 Yoga Tablet 2 關節及重心在底部，向後伸延令支撐力較強，蛇叔試過在不同交通工具上打字都未試過「反機」，可見流動工作比較勝任。
