SAY討論區

標題: ~忘不了小籠包~ 文字 + 大量劣圖(上網慢o既小心.... [打印本頁]

作者: bobodragon2001 時間: 2012-5-9 19:38:25 標題: ~忘不了小籠包~ 文字 + 大量劣圖(上網慢o既小心....

除夕夜book左檯同屋企人食飯
上開飯喇搵搵就腳又唔多使同人鬥迫o既食肆
就搵左呢間上海菜館鳥...

望落去之前先講明...
單靠一部電話仔, 無補光燈乜乜差差o既附加功能
單靠間鋪o既燈光
唔好expect d相會睇到你好開胃(會有d太光有d暗左咁.....Orz.....
純粹係keep 個record咁啫....
廢話少講, 去圖...

先黎睇睇個meun...

你咪睇佢分開左涼菜同熱食...以為會分開上...其實佢係邊樣整掂就上邊樣~
而且上菜速度仲幾快下...(唔知係咪因為都有人等位o既關係呢 )

涼菜

魚子醬燻蛋

魚子醬+蛋黃呢個配合幾正~ 不過因為係左佢地先o既關係....之後再食個蛋白就無乜味瞭...

蘿白絲海蜇皮
Sorry, 呢個無圖....因為同平時食o既真係無乜分別

花雕醉雞

真係僅熟的, d雞皮唔太厚幾啱我食, 好香酒味

熱食

砂鍋雲吞雞

d雞係斬件的, 一舊仔一舊仔咁幾易入口

雲吞無乜特別, d湯飲落有d似史雲生!?!?

黃金蝦球

食落好香蛋黃味(有d似奶黃包o既奶黃
d蝦好爽口, 外面脆脆地, 送飯啱曬

韮黃炒鱔糊

真係好似相咁油~ 睇落以為會幾咸的
食落又唔係喎, 唔送飯就咁啪都唔使點飲水
同埋碟野應該有落左d生蒜落去
我同屋企人都食到韮黃有生蒜味
同碟韮黃鱔糊d味又幾夾

上湯翡翠苗

真實唔係得咁少的....隻係小弟手腳慢....俾人食左半碟先記得影佢....
唔識野開頭以為同豆苗咁上下
上到檯, e, 一支支o既? 又幾爽口喎~ 清清地

黃金蝦仁炒飯

飯係炒到一粒粒, 淡淡地金黃色
食落去又係有好香蛋黃味~
d蝦夠乾身爽口, 一啖食左成隻

鱔糊同炒飯o既合照

之後羹鱔糊俾我一啖吞左XDDD

高力豆沙

呢個係乜傢夥? 沙翁? 泡芙?
面有糖粉, 內有豆沙, 仲唔係甜死人的!?!?
咬啖, e, 又估錯...係甜, 不過隻係甜甜地
仲有少少清甜o既感覺

入面d豆沙都係甜甜地, 唔係好重味

如是者, 成餐飯就結束瞭
最後講講佢d茶, 幾香幾滑口, 不妨飲多兩杯

P.S
飯後o係APM捕獲扮聖誕樹o既鴨仔, 同扮聖誕樹吊飾o既薑餅人各一枚XDDD

歡迎光臨 SAY討論區 (http://say.go2tutor.com/)